“gece.ws” xəbər verir ki, planetin ən nəhəng futbol bayramının start pərdəsi Meksikanın paytaxtı Mexiko şəhərində yerləşən əfsanəvi “Asteka” (Mexico City Stadium) stadionunda qaldırılıb.

Günün əsas qarşılaşmasında turnirin ev sahiblərindən biri olan Meksika millisi A qrupundakı ilk matçında Cənubi Afrika Respublikası (CAR) yığması ilə üz-üzə gələcək. Bakı vaxtı ilə saat 23:00-da start götürəcək oyunda 80 mindən çox azarkeşin tribunaları dolduracağı gözlənilir.

Qeyd edək ki, futbol tarixində bir ilkə imza atan DÇ-2026 eyni vaxtda üç ölkənin – ABŞ, Kanada və Meksikanın birgə ev sahibliyi ilə keçirilir. Üstəlik, turnir tarixdə ilk dəfə olaraq genişləndirilmiş formatda – 48 komandanın iştirakı ilə təşkil olunur. Bir ay boyu davam edəcək gərgin və maraqlı futbol marafona iyulun 19-da keçiriləcək böyük final matçı ilə yekun vurulacaq.